ОХУ-ын хэд хэдэн хотуудад өнөөгийн В.Путины засаг захиргааг эсэргүүцсэн жагсаал зохион байгуулагдлаа. Энэ удаагийн жагсаалыг сөрөг хүчний удирдагч Алексей Навальный удирджээ. Нийслэл Москва хотод эсэргүүцлийн жагсаал зохион байгуулах зөвшөөрлийг албаныхан өгөөгүй ч, 7-8 мянган хүн оролцож, Засгийн газрын авлига, хээл хахуулийг эсэргүүцэн жагссан байна. Гэвч цагдаагийн байгууллага тэдний эсрэг хүч хэрэглэж, ойролцоогоор 500 орчим хүнийг баривчилсны нэг нь Алексей Навальный байжээ. Тэрбээр баривчлагдахынхаа өмнө “Маш олон хүн жагсаалд оролцохын тулд Москвад ирсэнд туйлын их баяртай байна” хэмээн мэдэгдсэн байна.

Энэ удаагийн арга хэмжээг АНУ-ын Засгийн газар мөн шүүмжилжээ. Тэд тайван замаар эсэргүүцлийн жагсаалд оролцогсдыг баривчлах нь ардчиллын эсрэг “хүчирхийлэл үйлдэж буй хэрэг” хэмээн  ОХУ-ын Засгийн газрыг шүүмжилсэн байна.

Алексей Навальный энэ сард Ерөнхий сайд Дмитрий Медведев бүртгэлгүй ашгийн бус байгууллагын сүлжээ ашиглан өөрийн үл хөдлөх хөрөнгийн вант улсыг удирдаж буй тухай бичлэгийг олон нийтэд дэлгэсэн байдаг. Тус бичлэг “Youtube” хуудаст нийтлэгдэн, 11 сая гаруй хандалт авч байжээ. Москвад жагсаалд оролцоод баривчлагдсан хүмүүсийн тоог “OVD-info” сайт бүртгэсэн байх бөгөөд тэдний мэдээлэлд дурьдагдсанаар энэ удаагийн өргөн цар хүрээтэй эсэргүүцлийн жагсаалд оролцсон 933 хүн орон даяар баривчлагдсан аж.  Харин Интерфакс агентлагийн мэдээлснээр, Сент Петерсбург хотын төв хэсэгт болсон эсэргүүцлийн жагсаалд 4000 хүн оролцсоны 130 нь баривчлагдсан байна. Жагсаал Москва, Сент Петерсбургаас гадна Владивосток, Екатеринбург, Новосибирск зэрэг том хотуудад болжээ. Владивостокт болсон эсэргүүцлийн жагсаалд оролцогсдын 30 нь цагдаагийнханд баривчлагдсан байх бөгөөд тэд “Ерөнхий сайд Дмитрий Медведевийг  үүссэн асуудалд хариулт өгөх ёстой” хэмээн уриа хашгирч байжээ.

Энэ удаагийн жагсаал В.Путин дөрөв дэх удаагаа тус улсын Ерөнхийлөгч болохоос нэг жилийн өмнө 2011, 2012 онд болсон Кремлийн эсрэг жагсаалаас хойшхи хамгийн өргөн хүрээтэй жагсаал болжээ. Кремлийн хувьд “Өнгөрсөн баасан гарагт Москва хотын төв хэсэгт эсэргүүцлийн жагсаал хийх зөвшөөрөл хүссэн. Гэвч хууль бус өдөөн хатгалгын шинжтэй үйл ажиллагаа явуулах  гэж байсан тул холбогдох албаныхан татгалзсан хариу өгсөн” гэх мэдэгдэл гаргажээ. Эсэргүүцлийн жагсаалын гол зохион байгуулагч А.Навальныйгийн хувьд 2018 оны Ерөнхийлөгчийн сонгуульд нэр дэвшинэ гэдгээ өмнө нь зарласан байжээ. Гэвч, сүүлд явуулсан санал асуулгаар В.Путины рейтинг өндөр хэвээр байгаа нь сөрөг хүчнийхэнд боломж бараг байхгүй гэдгийг илтгэсэн хэрэг. Тиймдээ ч А.Навальный болон түүнийг дэмжигчид олон нийтийн анхаарлыг авлига, хээл хахууль руу чиглүүлж дэмжигчдийнхээ тоог нэмэгдүүлэхийг зорьж байна хэмээн зарим ажиглагчид онцлон тэмдэглэлээ.