Дэлхийн хамгийн хүчирхэг гүрний нэг болох Америкийн нэгдсэн улсын Ерөнхийлөгчийн сонгууль өнгөрсөн оны арваннэгдүгээр сарын 8-нд болж, Бүгд найрамдах намаас нэр дэвшсэн үл хөдлөх хөрөнгийн тэрбумтан Доналд Трамп ялалт байгуулсан билээ. Харин түүний өрсөлдөгч нь Ардчилсан намаас нэр дэвшигч, Төрийн нарийн бичгийн дарга асан Хиллари Клинтон байсан юм.
Улс төрд ажилласан туршлагагүй, зөвхөн нэг удаа Ерөнхийлөгчийн сонгуульд нэрээ дэвшүүлээд удалгүй түдгэлзсэн Доналд Трамп Нэгдсэн улсын улс төрд өөрийн нэрээ хэдийнэ тамгалж чадсан Х.Клинтоныг ялахад дэлхий нийт бүхэлдээ л шоконд орж байсан гэдэг. Тэгвэл нийгмийн сүлжээний аварга компани фэйсбүүк судалгаа явуулж, ОХУ АНУ-ын улс төрд хэрхэн нөлөөлсөн эсэхийг судалжээ.

Тус компани судалгааныхаа тайланг олон нийтэд мэдээлсэн юм. Тус тайлангаас үзвэл өнгөрсөн оны Ерөнхийлөгчийн сонгуулийн өмнө болон дараа  улс төрийн сөргөлдөөнийг улам дэвэргэх зорилготой сурталчилгаа, суртал ухуулга гаргах зорилготой маш олон хуурамч хаяг бий болж байжээ. Тэр дунд ОХУ-тай холбоотой хаяг олон байсан тухай фэйсбүүк компани мэдээллээ.

АНУ-ын Ерөнхийлөгчийн сонгуульд нөлөөлөхийн тулд ОХУ фэйсбүүк сүлжээг ашигласан байж болзошгүй гэх болгоомжлолтой холбоотойгоор тус компани судалгаа явуулж үзсэн байна. Ингэхэд АНУ-ын дотоодын улс төрийн хагарал үүсгэх, байгууллагын үйл ажиллагааны нэг хэсэг болгон ашигласан байх магадлалтай хуурамч хаягуудыг илрүүлжээ. Фэйсбүүк компанийн мэдээлснээр, 2015 оны зургадугаар сараас 2017 оны тавдугаар сар хүртэл нийтдээ 470 орчим хуурамч хаяг шинээр нээж, хуурамч мэдээллийг нийтэд цацаж, мөн тэрхүү ташаа мэдээллээ сайтад нийтлүүлэн 100 мянга орчим ам.долларын төлбөр төлж байсан нь илэрсэн аж.

Фэйсбүүкийн мэдээллийн аюулгүй байдал хариуцсан ажилтан Алекс Стамос “Энэ мөнгө 3000 орчим зар сурталчилгааг гаргасан дүн. Харьцангуй бага мөнгө байж магадгүй. Гэхдээ тус компанитай байгуулсан гэрээгээ зөрчсөн хаяг, сайтууд хаагдсан байсан” хэмээн ярьсан байна. Тэдгээр хуурамч хаягуудын нийтэлсэн постных нь ихэнх нь АНУ-ын Ерөнхийлөгчийн сонгуулийн үйл явц, тодорхой нэр дэвшигч, мөн санал хураалттай шууд холбоогүй ч, хүний эрхийн асуудал, ижил хүйстний эрх, зэвсэг эзэмших эрх, дүрвэгсдийн асуудал гэх мэт ард иргэдийн санаа бодлыг хуваах зорилготой улс төр, нийгмийн мэдээлэл зонхилж байжээ. АНУ-тай хамтран шалгалт явуулснаар үүнийг олж тогтоосон гэж “Фэйсбүүк” компани мэдэгдсэн байна. Өнгөрсөн онд болсон АНУ-ын ерөнхийлөгчийн сонгуульд Орос улс хөндлөнгөөс оролцсон гэх хэргийг мөрдөн шалгаж буй тусгай прокурор Роберт Мюллерт дээрх хэргийн нотлох баримтуудыг өгчээ.