Дэлхийн шилдэг гэрэл зураг: Дэлхийг сири рүү чиглүүлсэн зураг
“Үнэнийг хэлэхэд би хэзээ ч шокийн байдалд орсон Омран шиг хүүтэй таарч байсангүй. Түүнтэй ижил байдалд орсон хүүхдүүд ихэнхдээ, орилж хашгиран уйлдаг”. Энэ үгийг бидний өнөөдрийн “Дэлхийн шилдэг зураг” булангаараа уншигч танд хүргэж буй дээрх зургийг авсан Мустафа ал Сарут гэх зурагчин эр хэлжээ.
Оросын цэргийнхэн Сирийн Алеппо хотод агаараас цохилт өгсний дараа байшингийнхаа нуранги дороос азаар аврагдсан ч, юу ч хэлэх тэнхэлгүй болтлоо шоконд орж, цус тоосонд дарагдан эмнэлгийн тусламж авахаар хүлээж суугаа Омран Дакнеш хүү яагаад ч юм зурагчны сэтгэлийн чанад дахь нарийн утсыг хөндөж чадсан тул өөрийн эрхгүй л камераа гарган зургийг нь дарсан гэх.
Тэгвэл эдүгээ энэ зураг дэлхийн хамгийн олон орны хэвлэлд нийтлэгдэж, нийгмийн сүлжээнд хамгийн их тарж олон хүний сэтгэлд хүрч чаджээ. Мустафа ал Сарут бол Алеппог агаараас бөмбөгдсөний дараа мэргэжлийн ажлаа хийж явсан цөөн хэдэн гэрэл зурагчдын нэг байлаа. Гэхдээ түүний “boy in the ambulance” гэх энэ зураг таван жил үргэлжилсэн сирийн иргэний дайн руу дэлхий нийтийн анхаарлыг хандуулж чадсан нь хамгийн том амжилт байв.
Сарут “Орон нутгийн аврах ажилтнуудын ашигладаг чанга яригчийн дууг сонсоод би гүйж очсон. Тэнд маш олон нас барсан хүмүүс. Бас газарт хэвтэн ёолох маш олон шархадсан хүмүүс байсан. Гэтэл нэг хүү л нуранги дороос аврагдсан хэдий ч чив чимээгүй суух нь миний анхаарлыг татсан юм. Тэр юу ч хэлэхгүй. Шоконд орчихсон байсан. Орилох ч үгүй. Хэн нэгнийг дуудах ч үгүй гараараа цусаа арчиж байсан. Түүний хувьд цус, бөмбөгдөлт ердийн л зүйл.
Түүний амьдрал дэлхийн бусад хүүхдүүдийнхээс тэс өөр. Тэр гадагш гарч, тоглож чадахгүй. Тэр цус хараад уйлж бас гомдоллодоггүй. Яагаад гэвэл Омран өдөр бүр л ийм зүйлтэй нүүр тулдаг шүү дээ” хэмээн ярьсан байна. Зураг дээрх тавхан настай энэ хүү гэртээ сууж байгаад л гэр бүлийнхнийхээ хамт бөмбөгдөлтөд өртжээ.
Азаар эцэг эх нь амьд үлдсэн ч, 10 настай ах Али нь шархаа дийлэлгүй амьсгал хураасан байна. Эцэс төгсгөлгүй үргэлжилж буй Сирийн иргэний дайны гэм зэмгүй хохирогч бяцхан хүүхдүүдийн зөвхөн нэг жишээ нь л Омран хүү. Тиймээс ч энэ зураг нийгмийн сүлжээнд цацагдсан даруйд хүүхдийн эрхийг хамгаалахын төлөөх тэмцэл ч өрнөөд амжсан. Гэхдээ АНУ, ОХУ гэх мэт дэлхийн томоохон гүрнүүд гараа дүрсэн Сирийн дайн намжих найдвар харагдахгүй л байна.
МЭДЭЭНИЙ СЭТГЭГДЭЛ
ХОЛБООТОЙ МЭДЭЭ
Веб сайтад агуулагдсан мэдээлэл зохиогчийн эрхийн хуулиар хамгаалагдсан тул зөвшөөрөлгүй хуулбарлах хориотой.
Copyright © MMINFO.MN All Rights Reserved. Powered by HUREEMEDIA.
