Өмнөх нийслэлийн удирдлагын үеэс  олон нийтэд чиглэсэн аливаа шийдвэрийг гаргахдаа иргэдээс санал авч, тэдний саналыг  шийдвэртээ тусгадаг сайхан тогтолцоо бий болоод байгаа.  Тэгвэл шинэ хотын дарга маань энэхүү уламжлалыг орхигдуулалгүй  иргэдээс асууж шийдвэр гаргаж байна хэмээн ам өгөөд буй. Тиймээс ч ажил хэрэг болгож, нийслэлийн нутаг дэвсгэрт Түргэн үйлчилгээний цэг ажиллуулах журам, Нохой муур тэжээх, устгах журмын төслүүдэд  болон тээврийн хэрэгслийг гэрлэн дохио үл хамааран баруун гар тийш байнга эргэдэг болгох, тээврийн хэрэгслийн төлбөртэй зогсоол ажиллуулах зэрэг асуудлаар санал авч байгаа юм билээ.

Нэг талаар иргэдээс санал авч байгаа нь сайн хэрэг. Гэхдээ ямар асуудал дээр иргэдээс санал авах, ямар шугамаар авч байгаа нь сонин. Өмнө нь нийслэлийн иргэдэд өргөн хүрээнд хүртээмжтэй асуудлыг шийдэхдээ ард түмний  саналыг  гар утсаар, биечлэн, бичгээр, цахим сайтаар гээд зэрэг, зэрэг авдаг байлаа. Харин одоо  иргэдээс авч байгаа санал бодлыг цахим хаягаар л авч байна. Гэтэл нийслэлийн нийт иргэдийн 60-70 хувь интернэт орчин хягзаарлагдмал гэр хороололд амьдарч байгаа.  Юун тэр цахим хаягаар орж, аливаа шийдвэрт санал бодлоо тусгах манатай.  

Тиймээс нэгэнт л иргэдээс асууж байгаа л бол бэлгэ тэмдгийн шинжтэй бус өргөн хүрээнд хүртээмжтэй зүйл хий л дээ. Тухайлбал, тээврийн хэрэгслийн төлбөртэй зогсоол ажиллуулах, тээврийн хэрэгслийг гэрлэн дохио үл хамааран баруун гар тийш байнга эргэдэг болгох зэрэг бол  машинтай  хүн бүхний өдөр тутамын амьдрал шууд хамааралтай асуудал. Магадгүй иргэдийн саналыг өргөн хүрээнд хүртээмжтэй авч чадвал тээврийн хэрэгслийн төлбөртэй зогсоолын асуудал нийслэлийн иргэд хэрхэн хандаж байгааг хотын дарга маань төвөггүйхэн мэдэж болох биз. Харин цахим сайтаар ёс төдий санал тав, арван хүнээс аваад хотын иргэдээсаа асуучихлаа гэвэл том эндүүрэл шүү. 

Өнөөдөр  нийслэлийн бараг нэг ч байгууллага зогсоолынхоо асуудлыг  шийдэж чадаагүй гээд хэлчихэд хилсдэхгүй.  Арай гэж шийдсэн нэг нь төлбөртэй байгаа болохоор ингэж бухимдаад байна.  Тухайлбал, нийслэлийн удирдлагын “Хангарьд” ордоны гаднах зогсоол ч төлбөртэй л байгаа шүү дээ, өнөөдөр.  Тухайн ордонд нийслэлтэй холбоотой бараг бүхийл байгууллага байрлаж байгаа. Сая гаруй хүн амтай том хот юм чинь  өдөртөө хэчнээн мянган хүн ирж, “Хангарьд” ордонд байгаа байгууллагуудаар үйлчлүүлэх шаардлага гарч байгаа нь ойлгомжтой. Тэр болгонд төлбөртэй зогсоолд машинаа байрлуулах уу. Ойролцоох зам дээр машинаа тавьчихаад,  ачуулаад 70 мянган төгрөг төлөх үү гэдэг сонголт байдаг гээд бодохоор эмгэнэлтэй л тогтолцоо байгаа биз.

Тиймээс өөрчлөлтийг өөрөөсөө  гэдэг шиг нийслэлийн удирдлагын ордноосоо эхлээд үйлчилгээний бүх байгууллага зогсоолоо үйлчлүүлэгчиддээ үнэ төлбөргүй ашиглуулах захирамж гаргаж яагаад болохгүй гэж. Улмаар шинээр баригдаж байгаа барилга байгууламж бүрийг ядаж гаднаа 3-5 машины төлбөргүй зогсоолтой байхаар заагаад өгчихдөг баймаар байна.  Зогсоолыг төлбөргүй болголоо гээд уурлаж, бухимдаад эсэргүүцэх “толгой нь хамуурсан” хотын иргэн нэг ч байхгүй гэдэг нь ойлгломжтой. Тэгээд ч санал энэ тэр гэж бүрхэг зүйл хийж байхаар гудамжаар яваад харахад л сохор биш бол бүх зүйлийг олгох байлгүй.

 Албан ёсны төлбөртэй зогсоол 10 гаруйхан байдаг гэдэг. Тэгэхээр татвар төлдөг буюу зөвшөөрөл аваад иргэдээс төлбөр авдаг хэдхэн зогсоол байдаг гэсэн үг. Гэтэл бодит байдал дээрээ  байгууллага болгон гаднах зогсоолоо төлбөртэй болгочихсон. Тээврийн хэрэгсэлтэй хүн тухайн байгууллагаар үйлчлүүлэхийн тулд ороод гарахад л 1000-2000 төгрөг төлж байна. Үүнийг хянаж мэддэг газар гэж ч алга. Учир нь нийслэлд төлбөртэй зогсоол 10 биш 100 байгааг хянаж мэдэхгүй байгаагаас үүнийг харж болно.

Үйлчилгээний газрууд иргэддээ үнэ төлбөргүй үйлчлэх ёстой гэдэг үүднээс ШӨХТГ-ын экс дарга О.Магнай бие засах газруудыг үнэ төлбөргүй болгож чадсан. Томоохон худалдааны төвүүдийн үүдэнд хуурамж авахыг зогсоосон гээд сайн жишээ олныг хэлж болно. Хотын иргэддээ таалагдах шийдвэр гаргах л гээд байгаа юм бол “төлбөртэй зогсоол” гэдэг ойлголтыг үгүй хийгээд өгөөч,  хотын дарга аа.