Өнөөдөр Орхон аймагт Монгол Улсын ерөнхийлөгч У.Хүрэлсүх ажиллалаа. Түүнийг дагалдан Ерөнхийлөгчийн Тамгын газрын дарга Я.Содбаатар, БОАЖ-ын сайд Б.Бат-Эрдэнэ болон бусад албаны хүмүүс ирсэн бөгөөд аймгийн ИТХ-ын дарга Д.Мөнхбат, аймгийн ЗДТГ-ын дарга Д.Соёлчхүү, “Эрдэнэт Үйлдвэр” ТӨҮГ-ын дарга Х.Бадамсүрэн, “Ачит Ихт” ХХК-ын гүйцэтгэх захирал Д.Эрдэнэцэцэг нар угтан авлаа.

Монгол Улсын Ерөнхийлөгч энэ удаад “Тэрбум мод” үндэсний хөдөлгөөний хэрэгжилтийн явцтай танилцах зорилгоор ажиллаж буй. Энэ үеэр гидрометаллургийн аргаар катодын зэс үйлдвэрлэдэг “Ачит Ихт” ХХК-ын үйл ажиллагаатай танилцлаа. “Ачит Ихт” ХХК нь ирэх 10 жилд орон нутагт 3 сая мод тарьж ургуулахаар аймгийн Засаг даргатай санамж бичиг байгуулсан. Энэ хүрээнд Баян-Өндөр сумын Шар чулуутын аманд мод үржүүлгийн газар байгуулсан талаараа танилцуулсан.

Түүнчлэн Орхон аймгийн Баян-Өндөр суманд 3.3 га талбайг 100 хувь нөхөн сэргээж, 2016-2022 онд 3.1 га талбайд 8,500 гаруй мод тарьсан байна. Үүний дараа Уурхайчин соёлын ордонд “Эрдэнэт Үйлдвэр” ТӨҮГ-ын "Үр ашигтай хөрөнгө оруулалт, хэмнэлтийн бодлого уулзалт, зөвлөгөөн"-д оролцож уурхайчдад баяр хүргэж, мэндчилгээ дэвшүүлсэн юм. Мөн аймаг орон нутгийн удирдлагууд болон “Эрдэнэт Үйлдвэр” ТӨҮГ-ын ерөнхий захирал, холбогдох албан тушаалтнуудын хамтаар Монголд анх удаа байгуулагдаж буй ойн генетик нөөцийн “Эрдэнэт төв”-д ажиллалаа.

Тус төв нь нэн ховор, ашигт ургамлын болон модлог ургамлын үрийн сан бүрдүүлэх, ойн генетик нөөцийг хадгалах хамгаалах, тарьж ургуулсан ойн нөөцөө эдийн засгийн эргэлтэд оруулах, туршилт судалгаа хийх зорилготой ажээ. Тэрээр яг одоо Эрдэнэт хотын усан хангамжийн найдвартай ажиллагаа, аюулгүй байдлыг хангах зорилгоор байгуулагдаж буй цэвэр ус дамжуулах 3-р шугамын ажилтай танилцаж байна.