Эрүүл мэндийн яамнаас харвалт, цус өтгөрөлтийн талаар тайлбар мэдээлэл өглөө.

Эмнэлгийн тусламжийн газрын дарга Ж.Нарангэрэл “2022 оны байдлаар манай улсын тэргүүлэх таван өвчлөлд  амьсгалын замын тогтолцоо, хоол боловсруулах эрхтэн, шээс бэлгийн тогтолцоо, зүрх судасны тогтолцоо, гэмтэл хордлого ба гадны шалтгаант өвчлөл багтаж байна. Харин нас баралтыг зүрх судасны тогтолцооны нас баралт тэргүүлж байна. 1990 онд манай улсын хүн амын нас баралтыг амьсгалын замын тогтолцооны өвчлөл тэргүүлж байсан. Харин 1992 оноос өнөөдрийг хүртэл зүрх судасны өвчний улмаас нас барах тохиолдол тэргүүлж байна. 2022 оны эхний долоон сарын байдлаарх нас баралтын 10254 тохиолдлын 31.8 буюу 3263 тохиолдол нь зүрх судасны өвчний шалтгаант нас баралт байна. Энэ нь сүүлийн таван жилийн дунджаас 12 тохиолдлоор нэмэгдсэн хэдий ч 10 мянган хүн амд харьцуулахад 0.3-оор буурсан үзүүлэлттэй байна. Ковид-19 халдварын үед цус бүлэгнэлт явагддаг гэдэг нь олон улсад болон судалгаа шинжилгээгээр батлагдсан зүйл. Цус бүлэгнэлтийг зөвхөн урьдчилан сэргийлэх үзлэгээр  тодорхойлох боломжтой. Тиймээс урьдчилан сэргийлэх үзлэгт хамрагдаарай” хэмээсэн юм.

Улсын гуравдугаар төв эмнэлэгт 2019 онд 982, 2020 онд 1003, 2021 онд 789 тархины цочмог харвалттай эмчлүүлэгч хэвтэн эмчлүүлсэн байна. Харин 2022 оны долоодугаар сарын байдлаар 568 эмчлүүлэгч хэвтэн эмчлүүлсэн байна. УГТЭ-ийн эмч нарын хэлж буйгаар манай улсад даралт ихэссэнээс үүдсэн тархины эдийн цус харвалт түгээмэл байдаг.

Мөн эмч нар “Ковид-19 халдварын эсрэг вакцины дараах тархины эдийн болон бөглөрөх харвалтад огт өөрчлөлт гараагүй. 2013 оноос хойшхи есөн жилийн хугацаанд эдийн цус харвалт өндөр байсаар байна” гэлээ.

Залуусын дундах цус харвалт хэрхэн нэмэгдэж буй талаар тодруулахад “Сүүлийн 9 жилийн статистикаас харахад залуусын дундах тархины харвалт өссөн гэсэн статистик байхгүй. Ковид19 халдварын дараа болон вакцины нөлөөгөөр залуусын харвалт нэмэгдээгүй гэж ойлгож болно. Ковид-19 халдварын улмаас цус харвасан тохиолдол бүртгэгдээгүй” хэмээлээ.