Музейн барилга бол XXI зууны Монголын нийгэмд зориулсан XX, XXI зуун дамнасан сүүлийн 100 жилийн хамгийн том бүтээн байгуулалт.

• Чингис хааны өв соёл музейг байгуулах санаачилгыг одоогийн Ерөнхийлөгч У.Хүрэлсүх гаргаж 2019.07.03-нд Засгийн газрын тогтоолоор баталгаажуулсан.
• 2019.09.16-нд Төрийн ордонд 100 гаруй эрдэмтэн судлаачдын хэлэлцүүлэг дээр музейн үндсэн концепцийг танилцуулсан.
• 2020.04.02-нд шав тавих ёслол явагдаж, музейн барилга 1.6 жилийн дотор баригдаж дууссан.
• Барилгын үзүүлэлт, дэглэлтийн хэмжээгээр Ази тивд эхний аравт орохоор хэмжээний үзүүлэлттэй.
• Музейн барилга бүрэн автомат хяналттай УБ хотод байгаа хоёрхон барилгын нэг.
• Музейг барьж байгуулах хөрөнгийг 100 хувь Монгол Улсын төсвөөс бүрдүүлсэн.
• Барилгын зураг төсөл, үзмэр үзүүллэгийг дэлгэж үзүүлэх тавцан, хорго гэх мэт дизайныг дан монгол мэргэжилтнүүд хийсэн.
• Музейн сан хөмрөгийг хадгалах, үзмэр, үзүүллэгийг дэлгэн харуулах тоног төхөөрөмжийг олон улсын стандартын дагуу бэлдсэн.
• Чингис хааны музей байгуулагдсанаар дэлхийн хэмжээний үзэсгэлэнг зохион байгуулах олон улсын стандарт бүхий аюулгүй байдлыг хангасан, музейд ямар ч үзэсгэлэнг хүлээж авах боломжтой.

Монгол нутаг дээр байгаа өв соёл бол бүгд Чингис хааны өв соёл, түүний дээдсийн өв соёл, түүний удмынхны өв соёл, түүний үлдээж хоцроосон түүхийн асар их ул мөр. Эдгээрийг Чингис хаанаас салгаж ойлгох боломжгүй. Энэ музей бол зөвхөн үзмэр үзүүлэх газар биш, эрдэм шинжилгээ, судалгааны төв, соён гэгээрэл танин мэдэхүйн төв, орчин үеийн дижитал технологид тулгуурлан өв соёлоо сурталчлах томоохон төв, бас Монголын аялал жуулчлалын томоохон төв юм.

• Монголын хувьд дэлхийн хүн төрөлхтний бахархал болсон эзэн Чингис хааныгаа дэлхий дахинд сурталчлах, түүнийг хүндэтгэх ирээдүй үеийг бий болгоход томоохон үүрэг гүйцэтгэнэ.
• Монголын соёлын өвийн аюулгүй байдал, хадгалалт хамгаалалтыг бүрэн шийдвэрлэхэд томоохон хувь нэмэр оруулна.
• Музейн үзүүллэг, дэглэлт бүгдийг шинэ технологиор хийж музейн салбарын цоо шинэ үеийг бий болгож эхэлсэн.

Дэлхийн Монгол туургатнууд, Монголын ард түмэн, олон улсын жуулчид Монголын Эзэнт Гүрний үеийн дурсгал ямар хэмжээнд хангалттай байгаа вэ гэдгийг энэ музейг үзээд мэдэг хэмээн Чингис хааны өв соёл музейн захирал, доктор С.Чулуун хэлсэн юм. Мөн тэрбээр музейн нийт үзмэрийн 92 хувь нь эх үзмэр бөгөөд энэ 92 хувь бол Монгол Улсын нутаг дэвсгэрт хадгалагдаж буй нийт дурсгалын 10 хувьд ч хүрэхгүй. Тэгэхээр ийм хэмжээний музей дахиад 10 гаруй баригдах боломжтой хэмээн онцолж билээ.

• Улс орнуудад тархаж үлдсэн Монголын түүх соёлын үнэт өв олдворуудын албан ёсны зөвшөөрөлтэй хуулбаруудыг цуглуулсан.
• Эх үзмэр, үзүүллэгийн хувьд олон улсын өндөр түвшний үзүүлэлтийг хангасан.
• Олдсон бүх үзмэрийг тавиагүй, тэрэн дотроос шилж үзүүлсэн.
• Музейн тайлбарыг QR уншуулаад 5 хэл дээр сонсох боломжтой.
• Орчин үеийн техник технологийн дэвшил AR, VR, 3D-г ашиглаж байна.

Чингис хааны музей бол хэдхэн ажилтны мэдлийн газар биш, Монгол түмний өмч, тэгэхээр хүн болгон хүндэтгэл, зорилго, хүсэл мөрөөдөлтэйгөө оролцож хамтран ажиллаж болно.

• Монголын соёлын өв, баялаг түүхийг жуулчдад үнэн зөв, бодитой, стандартад нийцсэн нэг ч гэсэн музейгээр дамжуулан хүргэх боломжийг бүрдүүлсэн. УБ хотод ирсэн жуулчдын 90-ээс доошгүй хувь энэ музейг үзнэ гэж тооцож байгаа.
• Музейд бага насны хүүхдүүд, дунд насны сурагчид, хөгжлийн бэрхшээлтэй хүмүүст зориулсан боловсролын танхимуудыг байгуулсан.
• Хуулийн дагуу хүүхэд залуучууд Чингис хаан болон өвөг дээдсийнхээ агуу их түүхийг өгүүлсэн тус музейг хүссэн үедээ чөлөөтэй ирж үнэгүй үзэх боломжтой.