“Жендэрийн мэдрэмжтэй эрх зүйн шинэчлэлийн манлайлагч” уулзалтад ЗГХЭГ-ын дарга Д.Амарбаясгалан оролцлоо. Тэрбээр "Нэг жил орчмын хугацаанд улс төрийн намууд, иргэний нийгмийн байгууллагууд идэвх санаачлагатай хамтран ажиллаж, хүн амын 51,3 хувийг эзэлж буй эмэгтэйчүүдийн төлөөллийг шийдвэр гаргах түвшинд хэрхэн нэмэгдүүлэх вэ гэдэг дээр анхааран ажиллалаа.

Үүний үр дүнд УИХ-ын сонгуулиар жагсаалтаар дэвших 48 нэр дэвшигч эрэгтэй, эмэгтэй буюу 1:1 гэж эрэмбэлэгдэх юм. Мөн улс төрийн намууд тойрогт өрсөлдөх нэр дэвшигчдийнхээ 30 хувийг эмэгтэй байхаар нэр дэвшүүлэлтийг хийх хуулийн заалт батлагдаж чадсан. Эрх баригч нам амласан амлалтынхаа дагуу энэ хуулийн төслийг Засгийн газраас УИХ-д өргөн барьж батлагдах хүртлээ олон саад бэрхшээлийг давсан гэдгийг хэлэх нь зүйтэй.

Нийгэмд эмэгтэйчүүдийн үүрэг өндөр байдаг ч улс төрд, шийдвэр гаргах түвшинд хангалтгүй байгаа нь зарим бүлгийн дуу хоолой хаягдах эрсдэлийг бий болгодог. Тиймээс эмэгтэйчүүдийнхээ дуу хоолойг хангах нь жендэрийн тэнцвэрийг бий болгож, тэдний эрх ашгийг хамгаалахад чухал нөлөө үзүүлнэ. Цаашид ч аль нэг хүйстэй холбоотой саад бэрхшээлийг засахын тулд өөрчлөлт шинэчлэл хийх хэрэгцээ шаардлагыг бүрэн дэмжиж ажиллах болно." хэмээсэн байна