Электрон тоглоомын CS2-ын төрлийн энэ жилийн сүүлийн хамгийн том тэмцээн болох "Perfect World Shanghai Major 2024" тэмцээний Ази, Номхон далайн урьдчилсан шат буюу "Asia-Pacific RMR" өчигдөр эхлэлээ.

Шанхайн мажорт оролцох гурван эрхийн төлөө Ази, Номхон далайн шилдэг найман баг хүч үзэх тэмцээнд монголын "The MongolZ" баг оролцож байгаа бөгөөд эхний тоглолтоо өчигдөр Alter Ego багтай тоглож 13:8 харьцаагаар манай баг хожлоо. Улмаар өнөөдөр 16:00 цагт мажорын эрхийн төлөөх DRILLAS багтай тоглоно.

Харин монгол тоглогч Dobu-аар хүчээ зузаатгасан Индонезын "Alter Ego" өнөөдөр хасагдах шатанд 10:00 цагаас Хятадын Lynn Vision Gaming багтай тоглоно. Мөн Монгол дасгалжуулагчтай Австралийн "FlyQuest" баг Тalon багтай тоглож 13-9 харьцаагаар ялагдаж хасагдах шатанд өнөөдөр 13:00 цагт Оросын GR Gaming багтай тоглоно.

Өчигдөр буюу нээлтийн тоглолтууд Bo1 журмаар явагдасан бол бусад тоглолтууд Bo3 журмаар болно.

Манай багийн бүрэлдэхүүнд дасгалжуулагчаар Баянбатын Эрдэнэдалай /maaRaa/, багийн ахлагч Бямбасүрэнгийн Гарьдмагнай /bLitz/, Мөнхболдын Содбаяр /Techno4K/, Банзрагчийн Өсөхбаяр /910/, Батболдын Аюуш /mzinho/, Мөнхболдын Азбаяр /Senzu/ нар тоглоно.