НИТХ-ын дарга А.Баяр манай улсад суугаа Энэтхэгийн Элчин сайд ноён Атул Малхари Готсурвэг хүлээн авч уулзлаа. Уулзалт хоёр улсын найрсаг харилцаа, хамтын ажиллагааны түүхийн онцлог зэргээр эхэлж, нийслэлчүүдийн тулгамдсан асуудлыг шийдвэрлэхэд хамтран ажиллах боломжийн талаар ярилцахад чиглэлээ. НИТХ-ын дарга А.Баяр уулзалтын үеэр Монгол Улсын Засгийн газрын бодлого, тэр дундаа нийслэл Улаанбаатар хотын хөгжлийн богино, дунд, урт хугацааны төлөвлөгөөг танилцуулж, агаарын бохирдлыг бууруулах, авто замын түгжрэлийг сааруулах чиглэлд анхаарч, үе шаттай төсөл, арга хэмжээг хэрэгжүүлнэ гэдгийг онцоллоо.

Тухайлбал, “Агаарын бохирдлыг бууруулах чиглэлд  нарны эрчим хүчийг ашиглан гэр хорооллын дулааны асуудлыг шийдвэрлэх замаар яндангүй болгох, авто замын түгжрэлийг бууруулахад тодорхой төсөл арга хэмжээг хэрэгжүүлнэ. Үүний тулд Энэтхэг улсын арга туршлага, технологийн дэвшил, инженерийн шийдлүүдтэй танилцах бүрэн боломжтой”-г дурдлаа.  

 Энэтхэгийн Элчин сайд ноён Атул Малхари Готсурвэ “Нийслэлийг хөгжүүлэхийн төлөө хэрэгжүүлж эхэлж байгаа бодлого, шийдлүүд иргэдийн амьдрах нөхцөлийг сайжруулна гэдэгт итгэж байна. Хөрөнгө оруулалт, хамтын ажиллагаа, боловсрол, дэд бүтэц гээд өргөн хүрээнд таны санал санаачлагыг дэмжих, хамтарч ажиллахад бэлэн” гэдгээ илэрхийллээ.