Налайх дүүрэгт Менингококкт халдварын нэг тохиолдол бүртгэгдсэн. ХӨСҮТ-өөс уг өвчний нөхцөл байдлын талаар мэдээлэл хийх үеэрээ тус өвчнөөр өвдсөн хүү эндсэнийг мэдэгдэв.

Хүүхдийн биеийн байдал маш хүнд, амь тэмцсэн байдалтай ХӨСҮТ-д хүргэгдсэн. Харамсалтай нь өнөөдөр хүүгийн бие хүндэрч, үдээс өмнө эндлээ гэв.

ХӨСҮТ-ийн Ерөнхий захирал Э.Анхбаяр "Өнгөрсөн онд менингококкт халдварын таван сэжигтэй тохиолдол бүртгэгдэж, хоёр хүүхдээс илэрч эдгэрээд гарсан.

Өчигдөр Баянгол дүүрэгт сэжигтэй тохиолдол илэрсэн. Лабораторид шинжилгээний хариуг хүлээж байна. Тиймээс уг өвчний халдвараас иргэд урьдчилан сэргийлэх шаардлагатай байна.

Менингококкт халдварын өвчний үүсгэгч маш хоруу чанартай.  Уг халдварыг авсан тохиолдолд маш өндөр халуурч, цонхийж ирдэг.

Халууралт эхэлснээс хойш 6-8 цагийн дараанаас цусархаг тууралт гарч ирнэ. Эцэг, эхчүүд хүүхдийнхээ биеийг маш сайн ажиглах хэрэгтэй. Хүүхэд уйлагнасан, тавгүй байх юм бол яаралтай эмнэлэгт хандаж, эмчилгээ хурдан хийлгэх шаардлагатай. Агаар дуслын замаар халдварладаг. Уг халдварт өвчин маш хурдан хугацаанд хүндэрдэг учир мэдээлэлтэй байж, урьдчилан сэргийлэх шаардлагатай.

Халуурч, тууралт гарсан тохиолдолд яаралтайгаар эрүүл мэндийн байгууллагад хандахыг уриалж байна. Хичээл эхэлсэнтэй холбогдуулан маск зүүж, гараа халдваргүйтгүүлж, ариутгал хийхийг зөвлөж байна.

Менингококк халдварын товлолт болон сайн дурын вакцин байхгүй. Өмнөх жилүүдэд зорилтот бүлгийн хүмүүст тарьж байсан. Томуугийн вакцин шиг сайн дурын вакцин гэж байдаггүй. Уг өвчин тухайн бүс нутагт дэгдсэн тохиолдолд вакцинд хамруулдаг. Энэ асуудлаар ЭМЯ-тай хэлэлцэж байна" гэв.

Халдвар авсан үед халдварын шоконд орж эндэх тохиолдол байдаг байна.