Чөлөөт, сонгомол бөхийн 2025 оны Азийн АШТ Йорданы нийслэл Амман хотноо дөрөв дэх өдрөө болж өндөрлөлөө.Тэмцээний эхний хоёр өдөр сонгомол бөхийн медальтнууд тодорсон бол уржигдар /2025.03.27/ эмэгтэй таван жингийн барилдаан болж Монгол Улсаас таван жинд таван бөх өрсөлдөж Б.Мөнхнар (50 кг), Б.Отгонтуяа (55 кг), Э.Дэлгэрмаа (68 кг) нар хүрэл медаль хүртсэн билээ.

Тэгвэл өчигдөр эмэгтэй үлдсэн таван жингийн хэсгийн барилдаан боллоо. Манайхаас эмэгтэйчүүдийн 65 кг-д Монголын бөх Түвшинжаргалын Энхжин аваргын алтан медалийн төлөө Японы бөх, ДАШТ-ий алт, мөнгө, хүрэл медальт Мива Морикавагийн барилдаж 6-2 харьцаагаар ялагдал мөнгөн медаль хүртлээ. Ингэснээр Т.Энхжин хоёр жил дараалан тивийн аваргад үзүүрлэж байна. Тэрбээр хагас шигшээд Узбекистаны Шахзода Алланязоваг даралтаар цэвэр ялсан юм. Барилдааны явцад Т.Энхжин 4:0-ээр тэргүүлж яваад даралтад оруулан ялалт байгуулсан. 

Харин эмэгтэйчүүдийн 53 кг-ын хагас шигшээд шалгараад байсан Ч.Отгонтуяа БНАСАУ-ын бөх, “Парис-2024” олимпын хүрэл медальт Чо Хю Гёны эсрэг барилдлаа. Энэ барилдаан манай бөх крест мэхэнд дараалж оноо алдсаар 10:0-ээр ялагдав. Одоо Ч.Отгонтуяа хүрэл медалийн төлөө Казахстаны бөх, өсвөр, залуучуудын Азийн АШТ-ий мөнгө, хүрэл медальт Зеинеп Байановатай барилдаж 10-6 харьцаагаар ялагдсан байна.

Харин эмэгтэйчүүдийн 57 кг-ын Х.Болортуяа хүрэл медалийн төлөө барилдана. Тэрбээр эхний тойрогт Вьетнамын бөх Ти Нга Дуонгтой барилдаж 8-1 харьцаагаар ялж, улмаар шөвгийн наймд Японы бөх Сара Натамид 0-11 харьцаагаар ялагджээ. Улмаар Японы бөх аваргын төлөө гарч ирсэн бөгөөд манай бөх дагаж хүрэл медалийн төлөө БНХАУ-ын бөх Кексин Хонгтой барилдаж 0-10 харьцаагаар ялагдлаа.

Харин эмэгтэйчүүдийн 72 кг-ын З.Болортунгалаг хүрэл медалийн төлөө барилдана. Тэрбээр эхний тойрогт БНХАУ-ын бөх Юки Люд 4-6 харьцаагаар ялагдаж улмаар Хятадын бөх алтан медалийн төлөө барилдахаар болсноор манай бөх хүрэл медалийн төлөө залуучуудын олимпын мөнгө, хүрэл медальт, өсвөр, залуучуудын Азийн АШТ-ий мөнгө, хүрэл медальт, ДАШТ-ий 5-р байрын шагналт Узбекистаны Светлана Окназароваг даралтаар цэвэр яллаа.

Ингэснээр З.Болортунгалаг тивийн АШТ-ээс тав дахь хүрэл медалиа хүртэж байна. Тэрбээр мөн 2021 оны Азийн АШТ-д түрүүлсэн билээ.

Гэрэл зургийг Д.Нямбилэг (Монголын спортын сэтгүүлчдийн холбоо)