АН-ын Үндэсний бодлогын хорооны ээлжит 67 дугаар хуралдаан Төрийн ордонд боллоо.  Хуралдаанаар Улсын дээд шүүхээс буцаан ирүүлсэн АН-ын  Үндсэн дүрмийн нэмэлт өөрчлөлтийг хэлэлцэв. Хуралдааныг Ардчилсан намын дарга О.Цогтгэрэл тэргүүтэй Үндэсний бодлогын хорооны тэргүүлэгчид болох Ж.Батсуурь, Ж.Баярмаа, Б.Гарамгайбаатар нар удирдан явуулав.

Үндсэн дүрмийн нэмэлт өөрчлөлтийн талаарх тайлан мэдээллийг Ардчилсан намын Ерөнхий нарийн бичгийн дарга Н.Ганибал хуралдаанд оролцогч гишүүдэд танилцуулсны дараа 12 заалт бүхий нэмэлт өөрчлөлтийг Ажлын хэсгийн гишүүн Д.Эрдэнэбат танилцуулсан. Ардчилсан намын Үндсэн дүрмийн нэмэлт өөрчлөлтийн танилцуулгатай холбогдуулан хуралдаанд оролцсон Үндэсний бодлогын хорооны 26 гишүүн асуулт асууж, хариулт авав. УИХ-ын гишүүн Ж.Баясгалан хөгжлийн бэрхшээлтэй иргэдийн холбоог байгуулахтай холбоотой асуудлыг хөндсөн бол үг хэлсэн, асуулт асуусан гишүүдийн дийлэнх олонх нь Үндэсний бодлогын хорооны гишүүдийн тоог нэмэгдүүлэх талаар хөндөв. 

Дараагаар нь аравдугаар сарын 17-ны өдрийн Улсын дээд шүүхийн нийт шүүгчийн хуралдаанаар хэлэлцэн 12 заалтыг хуульд нийцүүлэх шаардлагатай хэмээн буцаасан Ардчилсан намын Үндсэн дүрмийн нэмэлт өөрчлөлтийг заалт тус бүрээр батлах санал хураалт явууллаа. Хуралдаанд оролцсон нийт гишүүдийн саналаар Ардчилсан намын Үндсэн дүрмийн нэмэлт өөрчлөлтийн төслийг баталж, Улсын дээд шүүхэд бүртгүүлэхээр хүргүүлэхийг дэмжсэн байна.  

Мөн хуралдааны үеэр АН-ын дээд шагнал “Их Эзэн Чингис хаан” одонг Н.Алтанхуягт гардууллаа.    Н.Алтанхуяг нь 1990 оноос хойш дөрвөн удаа Ардчилсан хүчнүүдийн Ерөнхий нарийн бичгийн даргаар ажилласан. Намын аппаратыг зангидаж, ажлын хүндийг нугалдаг энэ албыг хашсан тэрээр намын нөхдийнхөө итгэл, хүсэлтээр ээдрээ, зөрчилтэй, хүнд үед амжилттайгаар ажиллаж, зургаан ялалтыг байгуулсан.   2008 оны наймдугаар сарын 30-ны өдөр Ардчилсан намын даргаар сонгогдсон.  Түүний ялалтуудыг дурдвал, 2009 онд Ерөнхийлөгчийн сонгуульд ялалт байгуулсан. 2012 онд УИХ-ын сонгуульд ялалт байгуулсан, 2012 онд Нийслэлд анх удаа Ардчилсан нам ялалт байгуулсан, 2012 онд Аймаг, орон нутгийн сонгуульд ялав.  2013 он Монголын Улсын Ерөнхийлөгчийн сонгуульд дахин ялсан юм. Сонирхуулахад, тэрээр 2001 онд уг “Их Эзэн Чингис хаан” одонг санаачилсан түүхтэй юм. 

Эх сурвалж: "Зууны мэдээ" сонин

2025 ОНЫ АРВАННЭГДҮГЭЭР САРЫН 24. ДАВАА ГАРАГ. № 221 (7718)