Эрчим хүчний салбарынхны ажил хаялттай холбоотой асуудлаар  өчигдөр Эрчим хүчний сайд Б.Найдалаа байр сууриа илэрхийллээ.  Тэрээр "Байгаа боломжоо ашиглаад цалингийн санг 10 хувир нэмнэ. Гэхдээ нийтээр нь хавтгайруулахгүй. Харьцангуй өндөр цалинтай захирлууд захиргааны ажилтан, арын албанд ажилдаг хэсэгт нэмэхгүй. Энэ удаадаа тэвчинэ. Харин яг үйлдвэрлэл дээр ажиллаж ачаалал үүрч байгаа инженер, техникийн ажилтан болон цалин багатай залуусын цалинг нэмнэ. Би цалин нэмж болдог бол 50-100 хувиар нэмээд явмаар байна. Гэхдээ тэр мөнгө, орлого хаана байна вэ. Энэ орлогыг компаниуд бий болгох ёстой. Захирлууд ашигтай ажиллаж, хэрэггүй орон тоо байвал хасах ёстой. Энэ ажлыг хангалтгүй хийж ирсэн нь үнэн. Энэ чиглэлд илүү шаардлага тавьж ажиллана. Тэгэхээр компани хэнд хэдэн төгрөгийн цалин өгөх, аль зардлаа хэмнэх вэ. Ер нь хэдэн хүнтэй ажиллахаа шийдэх ёстой. Түүнээс биш хавтгайруулж өгөх ёсгүй.  Жишээлбэл, 20 сая төгрөгийн цалин авч байгаа хүнд 10 хувь нэмэх, 2 сая төгрөгийн цалин авч байгаа хүнд 10 хувь нэмэх гэдэг. ялгаатай. Энэ бол байж болшгүй зүйл. Үүнийг ялгааг арилгахын тулд цалингийн системийг өөрчилье гэж байна.

Үйлдвэрчний эвлэлээс "үнэхээр бага цалин авч байгаа хэн байна гэсэн тодорхой судалгаагаа гаргаад ир. Тэрэндээ анхаарч ажиллая" гэсэн. Одоохондоо хариу байхгүй байна. Бүгдэнд хавтгайруулж нэмэх үү гэхээр тийм гэж байна. Би үүнийг бодлогын хувьд зөвшөөрмөөргүй байгаа юм. Цалинг шударга болгох ёстой. Тухайлбал, олон жил ажилсан гээд сайн байна уу, муу байна уу хамаагүй нэмэгдэл өндөр авдаг энэ зөв үү. Сайн ажиллаж байгаа залуу боловсон хүчин яагаад өндөр цалин авч болохгүй гэхчлэн бидэнд бодох зүйл их бий. Үүн дээр ул суурьтай системийг нь өөрчлөхгүй бол цоорхой сав руу ус хийдэг шиг үр ашигггүй зардал урсах магадлалтай юм. Цалин мөнгө ер нь ажилтны асуудлыг шийдэхийн тулд тооцоо судалгааг сайн хийх хэрэгтэй. Бид Үйлдвэрчний эвлэлийг хамтарч ажиллая гэж урьж байгаа. Салбарыг иж бүрнээр нь шинэчлэх бодлого явж байна. Бид бие биендээ шаардлага тавьж хоёр, гурван талд гарч суух цаг биш. Энэ салбарыг өндийлгөхийн тулд хамтарч ажиллая. Цалингийн системээ шударга болгоё. Ажилчдын нийгмийн болон хөдөлмөрийн аюулгүй байдлын асуудлыг иж бүрнээр нь бодохыг хүний нөөцийн бодлого буюу нийтлэг эрх ашиг гэхээс биш зөвхөн цалин асуудлын шийдэл биш. Салбарын сайдын хувьд яаман дээр бодлогын түвшинд яг энэ асуудлыг шийдэхээр нэг бодлого гурван зарчим есөн үндсэн ажил гэсэн зүйлийг томьёолж амжилттай хэрэгжүүлж байна. Энэ дээр хамтран ажиллахыг уриалж байна.

Салбарынхаа нийт ажилтнуудаас хичээнгүйлэн уриалж хүсэх зүйл байна. Бид 100 жилийн турш Монгол Улсыг галтай байлгаж ирсэн. Бидний ахмад үе цаг наргүй, өдөр шөнөгүй үүргээ ухамсарлаад ажиллаж ирсэн. Энэ байтугай хүнд нөхцөлд, энэ байтугай цалингүй ажиллаж ирсэн. Тэд хэзээ ч гал алдаагүй. Тэр байтугай 1990-ээд оны хүнд үед ч гал алдаагүй. Энэ бол бидний бахархал юм. Цаашдаа энэ салбар иймэрхүү зүйлд торох ёсгүй. Эрчим хүчийг экспортолж дотоодоос бус олон улсын хэмжээний цалин авах боломж байгаа. Асуудлаа давахын тулд ойр зуурын, улс төрийн ч юм уу жижиг явуулгад авталгүйгээр ажлаа чин шударгаар хийж ард нь гарвал бидэнд боломж их байна. Ажил хаях эсвэл ажлаа орхих шаардлагагүй. Цаг үеэ олоогүй тэмцэлд авталгүйгээр дор дороо хариуцлагатай шийдвэр гаргаж ажил үүргээ ухамсартай хийхийг уриалж байна. Бид шинэчлэлийн бодлогоо хэрэгжүүлбэл 30 хувь байтугай нэмэх боломжтой” гэлээ.

Эх сурвалж: "Зууны мэдээ" сонин

2026 ОНЫ ДОЛООДУГААР САРЫН 2. ПҮРЭВ ГАРАГ. № 125 (7867)

Хуурамч мэдээлэл хаа сайгүй тархах болсон энэ үед баримттай, эх сурвалжтай, үнэн бодитой мэдээллийг “Зууны мэдээ” сониноос аваарай.

Үнэн мэдээллийг хамтдаа хамгаалцгаая.

Бие даасан сэтгүүл зүйг дэмжин "Зууны мэдээ" захиалаарай. www.zuuniimedee.mn