Дундговь аймгийн Засаг дарга С.Мөнхчулуун өөрийн цахим хуудсан аймгийнхаа наадмын талаар нийтлэл оруулжээ. Тодруулбал, 

Дундговийн наадам шударга, найраагүй, ил тод зохион байгуулалттай болно.

7 дугаар 24, 25, 26-ны өдрүүдэд болох Дундговь аймгийн баяр наадам нь зөвхөн аймгийн хэмжээний төдийгүй улсын болон бүсийн чанартай томоохон спортын арга хэмжээнүүдийг хамруулснаараа онцлогтой.

Наадмын хүрээнд Говийн бүсийн хурдан морины уралдаан, спортын мастер цолны болзол хангах улсын бүсийн сурын харваа, шагайн харваа, нумт харваа тус тус зохион байгуулагдана.

Говийн бүсийн хурдан морины уралдаанд үзүүлсэн амжилт нь улсын хэмжээний амжилтад тооцогдох бол улсын бүсийн сурын харваанд амжилт гаргасан харваачид аймгийн цол хүртэхээс гадна спортын мастер цолны болзол хангах боломжтой.

Наадмын үндсэн зохион байгуулалтыг Дундговь аймгийн ЗДТГ хариуцан ажиллаж байгаа бөгөөд спортын төрөл тус бүрийн тэмцээн, уралдааныг тухайн чиглэлийн мэргэжлийн холбоод дүрэм, журмын дагуу зохион байгуулна.

Аймгийн зүгээс бүх төрлийн арга хэмжээний зохион байгуулалтад хяналт тавьж, шударга, ил тод, нээлттэй явагдах нөхцөлийг бүрдүүлэн ажиллана.

Хурдан морины уралдаанд оролцох морьдыг гарааны өмнө болон барианд орсны дараа хоёр удаа хэмжилт хийж баталгаажуулах бөгөөд хэмжилтийн үйл явцыг шууд дамжуулж, дэлгэцээр олон нийтэд нээлттэй үзүүлнэ.

Үндэсний бөхийн барилдааны хувьд 7.24-ний өдөр аймгийн цол олгох аймаг, цэрэг, сумын цолтой болон цолгүй бөхчүүдийн барилдаан, 25, 26-ны өдрүүдэд Говийн бүсийн наадамд зориулсан хүчит бөхчүүдийн нээлттэй барилдаан гэсэн хоёр ангиллаар зохион байгуулагдана. Цол олгох барилдаанд амжилт гаргасан бөхчүүдээс допингийн шинжилгээ авч, холбогдох дүрэм, журмыг чанд мөрдөн ажиллана.

Дундговийн наадам ил тод зохион байгуулалт, шударга өрсөлдөөний жишиг болох болно.

Наадмын нээлтэд Ардын жүжигчин, гавьяатуудаас эхлээд Төв Халхын Дуулалт жүжгийн театрын уран бүтээлчид оролцож уран бүтээлээ толилуулах бол Наадмын оройн шоунд Рок, попын одууд, лазер шоу, ДЖ шоу гээд олон сонирхолтой үзүүлбэрүүд та бүхнийг хүлээж байна.

Наадамчин олон та бүхэн хүрэлцэн ирж, саатан морилоорой!