Хөлбөмбөгийн ДАШТ-ий урьдчилсан шатны Европын бүсийн D хэсгийн тоглолтууд сонирхолтой өрнөж байна. Өнгөрсөн шөнө хэсгийг 12 оноотой тэргүүлж байсан Сербийн шигшээ талбайдаа Молдавыг хүлээж авч, 3:0-ээр буулгаж авлаа.

Тоглолтын 20 дахь минутад Гачинович тооны харьцааг нээж, Коларов 30, Митрович 81 дэх минутад нэг нэгийг нэмж, гүйцээжээ. Хожигдсон Молдав 2 оноотой сүүл мушгиж байна.

Тэгвэл Сербитэй адилхан оноотой явсан Ирландын шигшээ энэ тойрогт Гүржийн талбайд зочилж, 1:1-ээр тэнцлээ. Ингэснээр 13 оноотой болж, хоёрдугаар байрт бичигдэж байна. Гүрж харин ердөө л 4 оноотой боллоо. Тоглолтын 4 дэх минутад Даффи тооны харьцааг нээсэн ч 34 дэх минутад Казаишвили тэнцүүлж дөнгөжээ.

D хэсгээс дэлхийн аваргын эрхээ авахын төлөө тэмцэж байгаа Уэльсийн шигшээ энэ удаад Австрийг 1:0-ээр талбайдаа хожлоо. Ингэснээр 11 оноотой болж, Ирландын бүдрэлтийг сайн ашиглалаа. Үлдсэн гурван тойрогт сайн үзэхэд Уэльс хэсгээ тэргүүлэх ч онолын боломж байгаа. Учир нь дараагийн тойрогт Ирланд талбайдаа Сербитэй үзнэ. Тэргүүлэгч хоёр багийн аль нэг нь, эсвэл хоёулаа ч оноо алдах магадлалтай. Энэ удаагийн тоглолтын хувь заяаг шийдсэн ганц гоолыг 74 дэх минутад Бен Вудберн оруулжээ.