БНСУ-ын анхны эмэгтэй Ерөнхийлөгч Пак Гын Хе авлига, албан тушаалаа урвуулан ашигласан зэрэг хэрэгт буруутгагдан суудлаасаа буусан. Улмаар түүний залгамжлагчийг сонгох ээлжит бус Ерөнхийлөгчийн сонгуульд тавдугаар сарын 9-нд боллоо. Сонгуульд нийтдээ 11 эрхэм аль нэг улстөрийн хүчнээс нэр дэвшсэн юм. Гэхдээ урьдчилсан санал асуулгуудад Ардчилсан нам болон Ардын намын нэр дэвшигчид тэргүүлж байсан билээ.

Сонгуулийн санал хураалт өчигдөр 06:00 цагт орон даяар 3507 санал авах байрт зэрэг эхэлж, оройн 20:00 цагт өндөрлөж, албан ёсоор санал тооллогын ажиллагаа эхэлжээ.

Гэвч сонирхолтой нь,  Сонгуулийн Ерөнхий хорооноос 20:30 цагийн үед мэдээлэл хийж, санал тооллогын ажиллагаа 8.55 хувьтай байгааг зарлахад л БНСУ-ын дараагийн Ерөнхийлөгч хэн болох нь тодорхой болчихсон байв.

Учир нь томоохон мэдээллийн агентлагууд гарцан дахь санал асуулгын дүнд үндэслэн Ардчилсан намын дарга Мүн Жэ Ин сонгуульд үнэмлэхүй ялалт байгуулж, ирэх таван жилд Азийн дөрөв дэх том эдийн засагтай бар улсыг тэргүүлэхээр болсныг зарласан юм.

Гарцан дахь санал асуулгын дүнгээр Мүн Жэ Ин 37.43 хувь, Эрх чөлөөт Солонгосын намын нэр дэвшигч Хон Жён По 28.92, төвийн үзэл баримтлалт Ардын намын нэр дэвшигч Ан Чёл Су 21.15 хувийн саналыг тус тус авчээ.

Улмаар Мүн Жэ Ин ялалтаа зарлаж, “Ард түмний Ерөнхийлөгч байх болно” хэмээн амласан байна.

Үүнээс гадна бусад нэр дэвшигчид ч, санал тооллогын дүн албан ёсоор гараагүй байхад ялагдлаа хүлээн зөвшөөрсөн юм.

Хон Жун Пё оройн 22:30 цагийн үед буюу гарцан дахь санал асуулгын дүн гарсны дараа ялагдлаа албан ёсоор хүлээн мэдэгдэл хийжээ. Тэрбээр намын байрандаа хэвлэлийн хурал зарлан “Би намаа дахин сэргээж чадсандаа сэтгэл хангалуун байна. Сонгуулийн дүнг хүлээн зөвшөөрч байна” гэжээ.

Өнөөгийн эрх баригч Сэнүри нам Пак Гын Хетэй холбоотой хэргүүд илэрч, тус намын рейтинг унаж эхлэх үед нэрээ солин “Эрх чөлөөт Солонгосын нам” болгон өөрчилсөн байдаг. Улмаар Пактай холбоотой дуулиан дэгдсэн тухайн үед дэмжигчдийнх нь хувь 16 хүртлээ унаж байсан бол энэ сонгуульд Ардын намын нэр дэвшигчийн өмнө гишгэж чаджээ. Харин Ардын намаас нэр дэвшигч Ан Чёл Су өчигдөр орой 22:40 цагийн үед ялагдлаа хүлээн зөвшөөрчээ. Тэрбээр хуран цугларсан нийт дэвшигчидтэйгээ хүн нэг бүртэй нь гар барьсан байна. Улмаар “Ард түмнийхээ сонголтыг хүндэтгэж байна. Миний хүч дутлаа. БНСУ-ын Ерөнхийлөгчтэй цаашдаа хамтран ажиллахыг хүсч байна. Намайг дэмжсэн ард иргэд, намын нөхөддөө үнэхээр их баярлалаа” хэмээн, сонгуульд ялагдсанаа албан ёсоор хүлээн зөвшөөрчээ.