Орхон аймаг “Эрдэнэт мах маркет” ХХК-ийн нийлүүлсэн 150 тонн махыг өнөөдрөөс эхлэн Баян-Өндөр Жаргалант сумдад 29 цэгээр дамжуулан худалдаалж эхэллээ. Энэ нь баг бүрт нөөцийн мах худалдаалах цэгүүд ажиллаж байгаа гэсэн үг юм.

Жил бүрийн 3-р сарын сүүлээс 6-р сарын эхэн хүртэл хүн амын хаврын хэрэгцээнд бэлтгэн худалдаалдаг нөөцийн махны хувьд энэ жил 90 тонн хонины мах, 45 тонн үхрийн мах, 15 тонн ямааны мах нийлүүлэгдэх юм.

Савлагааны хувьд Монгол улсад мөрдөгдөж байгаа стандартын дагуу мах, ясны харьцаа 70/30 байх бөгөөд 2-3 килограммаар савлагдаж байгаа ажээ. Махны чанарын хувьд МХГ, МЭГ-ийн эрүүл ахуйн байцаагч нарын дүгнэлтээр баталгаажсан үйлдвэрийн аргаар бэлтгэсэн мах худалдаалагдаж эхэлсэн гэдгийг хэлж байна. Нөөцийн махны жижиглэнгийн үнэ: Үхрийн мах нэг килограмм тутамд 7800, хонины мах 6800, ямааны мах 5800 төгрөгийн үнэтэйгээр борлуулагдана.