Хурц ширүүн мэдэгдлээрээ алдаршсан “Шийтгэгч” хочит Филиппиний Ерөнхийлөгч Родриго Дютерт  АНУ-ын Ерөнхийлөгч Барак Обамад хандан “Там руугаа тонил” гэж хэлжээ.

Тус улсын хувьд сүүлийн хэдэн арван жилийн турш тасралтгүй үргэлжлүүлж байсан АНУ-тай хамтарсан цэргийн сургуулилтаа энэ оноор дуусгавар болгож, харин оронд  нь БНХАУ, ОХУ-тай  ойр харилцаатай байхыг эрхэмлэх болсон байдаг. 

Филиппинд өрнөж буй Дютертын эхлүүлсэн гэмт хэрэгтнүүдийг шийтгэх ажиллагааны явцад олон мянган хүн амиа алдсан явдлыг АНУ хүчтэй шүүмжилж байгаа билээ. 

Тэгвэл АНУ, НҮБ, ЕХ-оос Филиппиний Ерөнхийлөгчийг хүний эрхийн зөрчлөө зогсоохыг шаардсан тай холбогдуулан  Родриго Дютерт мэдэгдэл хийж, “Би АНУ-г хүндлэх хүндлэлээ алдсан. Б.Обама там руугаа тонил”  гэж хэлжээ. Мөн Америкчуудыг “Хоёр нүүртэн” хэмээж, цаашдаа хоёр улсын холбоотны харилцаагаа тасалж ч магадгүй хэмээн анхааруулсан аж.

Тэрбээр “Намайг Ерөнхийлөгч байх хугацаанд АНУ-тай харилцаа тасарч магадгүй. ОХУ, БНХАУ-тай хийх харилцаа бол сайн байна. Бид тэдгээр хоёр улсын үзэл суртлыг хүлээн зөвшөөрч чадахгүй ч, хүндэлнэ. Хүндлэл гэдэг маш чухал” гэсэн байна.