Нийтийн тээврийн салбарт байгаа зохион байгуулалттай бүлгийг цэгцлэхгүй бол парк шинэчлэл үр дүнд хүрэхгүй.

Нийслэлийн нийтийн тээврийг шинэчлэх ажил 2009 оноос хойш хэд, хэдэн удаа хийгджээ. Тухайн үед БНСУ-ын Daewoo компанийн 400 автобусаар парк шинэчлэлт хийсэн. Ингэхдээ нээлттэй тендер хийхгүйгээр шууд гэрээний аргаар хийсэн байна.

Энэ автобуснуудыг төсвийн хөрөнгөөр худалдаж авсан ч улсын эсвэл нийслэлийн өмчид бүртгэхгүйгээр 10 ААН-д шууд шилжүүлсэн байгаа юм. Эдгээр ААН-үүд бараг эргэн төлөлт хийгээгүйтэй ялгаагүй. Ердөө 13-30 хувийн эргэн төлөлттэй байна.

Эргэн төлөлт хийгдээгүйгээс болж улсад 30 гаруй тэрбум төгрөгийн хохирол учруулсан. Энэ хугацаанд Нийслэлийн өмчийн харилцааны газраас хохирлыг нөхөн төлүүлэхээр шүүхэд хандсан боловч анхнаас нь шууд хувийн ААН-үүдэд бүртгүүлсэн учир нэхэмжлэх эрхгүй гэдэг шалтгаанаар нэхэмжлэл хүлээн авч, иргэний хэрэг үүсгэхээс татгалзсан байдаг.

Нийслэлийн удирдлагын баг 2009 оноос эхлэн төрийн болон орон нутгийн өмчийн хөрөнгөөр худалдан авсан бүх автобусны асуудлыг бүхэлд нь шалгуулна.