Эрүүл мэндийн дэд сайд С.Энхболд болон ДЭМБ-ын Монгол дахь суурин төлөөлөгч Сокорро Эскаланте нар үндэсний хэмжээнд зохион байгуулж байгаа урьдчилан сэргийлэх эрт илрүүлгийн үзлэгийн хамрагдалтыг эрчимжүүлэх чиглэлээр Ховд аймагт ажиллаж байна.

Улсын нэг, хоёр, гуравдугаар төв эмнэлгийн нарийн мэргэжлийн 39 эмч, лаборантаас бүрдсэн орон нутагт эрт илрүүлгийг эрчимжүүлэх явуулын багууд тус аймгийн иргэдийн дунд эрт илрүүлгийн үзлэг, шинжилгээ, оношлогоог зохион байгуулж байгаа юм. Өнгөрсөн оны тавдугаар сарын 1-нээс эхэлсэн эрт илрүүлэгт нийт хүн амын 40 шахам хувь хамрагдаад байгаа бөгөөд Засгийн газраас энэ онд хамрагдалтыг нэмэгдүүлэх зорилт тавьсан.

Энэ хүрээнд Эрүүл мэндийн сайд А/256 тоот тушаал гарган ЭМЯ-ны харьяа төрөлжсөн мэргэшлийн эмнэлэг, үндэсний төвүүдээс эмч нарын баг гарган орон нутгийн иргэд, малчин өрхүүдийг үзлэгт бүрэн хамруулахын тулд орон нутгийн засаг захиргаатай хамтран ажиллаж байгаа юм.

Дэд сайд С.Энхболдоор ахлуулсан эрт илрүүлгийг эрчимжүүлэх баг Ховд аймгийн Булган, Мөст, Зэрэг, Мянгад сумдад байршин ойролцоох сумдын иргэд малчдыг хуваарийн дагуу хамруулснаар нийт 14 сумын 3155 хүнд үзлэг, шинжилгээ, оношлогоо хийжээ.

Эрт илрүүлгийн багт төвөөс очсон эмч нараас гадна сумдын Засаг даргаар ахлуулсан Эрүүл мэндийн төвийн эмч, мэргэжилтнүүд, сумдын Тамгын газрын ажилтнууд хамтран ажиллаж иргэдийг хуваарийн дагуу эрт илрүүлэгт идэвхтэй оролцуулахад дэмжлэг үзүүлсэн байна.