БНСУ-ын Ерөнхийлөгч Пак Гын Хе өнөөдөр ард түмэндээ хандан мэдэгдэл хийж, жирийн эмэгтэй найздаа төрийн нууц мэдээллийг дамжуулж байсан гэх хэргийнхээ талаар дурьдаж, “Бүгд миний алдаа байсан” хэмээжээ. Улмаар хуулийн байгууллагынхан түүнийг шалгахыг хүсвэл  хүсэлтийг хүлээн авахаа илэрхийлсэн байна.

Пак Гын Хегийн дотны найз төдийгүй, энэ байдлаа ашиглан  Ерөнхийлөгчийн улс төрийн хэрэгт оролцож байсан гэх хэрэгт сэжиглэгдэж буй Чой Сун Силийг албан тушаалаа урвуулан ашигласан, их хэмжээний хөрөнгө залилсан үндэслэлээр өчигдөр албан ёсоор баривчлан хорьсон байдаг.  Тэгвэл Пак телевизээр дамжуулан хийсэн мэдэгдэлдээ “Шаардлагатай бол би ч гэсэн хуулийнханд шалгуулахад бэлэн байна” гэдгээ онцолжээ. Мөн “Бүгд миний алдаа. Миний ухаангүйгээс боллоо” хэмээж, найзыгаа өмгөөлөхийг оролдсон байна.

Гэхдээ Чойн эцгийн байгуулсан шашны байгууллагыг удирдаж, Хөх ордонд шашны үйл ажиллагааг зохион байгуулж байсан гэх мэдээллийг эрс үгүйсгэжээ.  БНСУ-ын хуульд Ерөнхийлөгчийн албан тушаалыг хашиж буй хүнд  дайны гэмт хэрэг үйлдэх, эх орноосоо тэрсэлснээс бусад тохиолдолд эрүүгийн хэрэг үүсгэн шалгах боломжгүй байдаг аж. Пак Гын Хе авлигын дуулиан дэгдсэнээс хойш 10 хоногийн дотор хоёр ч удаа мэдэгдэл хийсэн нь энэ юм. Сүүлийн үеийн олон нийтийн санал асуулгын дүнгээр Ерөнхийлөгч Пак Гын Хег дэмжигчдийн хувьд түүхэнд хамгийн доод төвшинд буюу 5 хувь хүртлээ унаад байна.