БНСУ-ын Ерөнхийлөгчийн сонгууль ирэх сарын 9-нд болох билээ. Тус сонгуульд нийтдээ 15 нэр дэвшигч өрсөлдөж буй бөгөөд тэднээс хамгийн рейтинг өндөртэй, гол таван улс төрийн хүчний төлөөлөл энэ сарын 23-нд телевизийн халз мэтгэлцээнд оролцжээ. 

 

Тэгвэл тус сонгуульд хамгийн рейтинг өндөртэй яваа Ардчилсан намын Мүүн Жэ Ин, Ардын намын Ан Чол Су нар Солонгосын хойгийн нөхцөл байдал, пуужин эсэргүүцэгч THAAD системтэй холбоотойгоор ширүүн мэтгэлцээн өрнүүлсэн байна. 

 

Мүүн Жэ Ин мэтгэлцээний үеэр “Хойд Солонгосын цөмийн хөтөлбөрийн өдөөн хатгалга үргэлжилсээр байна. Зэвсэг техникийнх нь ч хүчин чадал, технологи нь улам нарийссаар байхад Хван Кё Ан, Пак Гын Хэгийн засаглалын аль аль нь ямар ч дорвитой үйл ажиллагаа хэрэгжүүлж чадсангүй” хэмээн шүүмжлээд амжжээ. Түүнчлэн, “Олон улсын дипломат харилцааг хүндэтгэж, БНАСАУ-д цөмийн хөтөлбөрөө бүрэн хөгжүүлж, Өмнөд болон Хойд Солонгосын харилцаанд эргэлт гаргаж чадна гэдэгтээ итгэлтэй байгаа”-гаа энэ үеэр онцлон тэмдэглэжээ. Харин дэмжигчдийнхээ тоогоор эдүгээ хоёрдугаарт эрэмбэлэгдэж буй “Ардын нам”-ын Ан Чол Су АНУ-ын армийн хамгийн сүүлийн үеийн Пуужингийн довтолгооноос эсэргүүцэн хамгаалах систем болох “THAAD”-ийг дэмжсэн байр суурьтай байгаагаа илэрхийлж, “Тус системийг байрлуулахыг эсэргүүцэж байсан намын албан ёсны байр суурь өөрчлөгдсөн” гэж мэдэгдсэн байна.

 

Харин үүнийг эсэргүүцэгч буюу пуужингийн довтолгооноос хамгаалах систем байрлуулах эсэхийг дараагийн Засгийн газар шийдэх ёстой гэсэн байр суурьтай байгаагаа өмнө нь тодорхой илэрхийлж байсан Мүүн Жэ Ин “Ардын нам  THAAD систем байрлуулахыг хүчтэй эсэргүүцэж байсан атлаа Ерөнхийлөгчид нэр дэвшигчийнхээ үзэмжээр байр сууриа өөрчилжээ. Тэгвэл тус системийг эсэргүүцэж байгаа БНХАУ-ыг хэрхэн ятгах вэ” хэмээн эргэлзсэн өнгө аястайгаар хариулсан байна. 

 

Сонгуулийн төв хорооноос ирэх сарын 9-ний өдрийг хүртэл нийтдээ гурван удаагийн халз мэтгэлцээнийг нэр дэвшигчдийн дунд зохион байгуулна. Харин энэ удаагийнх нь хамгийн эхнийх нь бөгөөд нэр дэвшигчид улс төр, гадаад бодлогынхоо талаар санал солилцжээ. Түүнчлэн ирэх баасан гарагт болох хоёр дахь удаагийн мэтгэлцээнээр эдийн засгийн асуудал, тавдугаар сарын 2-нд нийгмийн асуудлын талаар тус тус мэтгэлцэх юм байна.

 

Ажиглагчдын үзэж буйгаар энэ удаагийн сонгуулийн гол өрсөлдөөн Ардын нам болон Ардчилсан намаас нэр дэвшигчдийн хооронд өрнөх аж. Хамгийн сүүлийн үеийн санал асуулгад оролцогсдын ойролцоогоор 80 орчим хувь нь тэднийг дэмжихээ илэрхийлжээ.