Францын Ерөнхийлөгчийн ээлжит сонгууль ирэх жил болно. Гэсэн ч, аль хэдийнэ нэр дэвшигчид нь тодорч, нам доторх анхан шатны сунгаанууд тус улсад өрнөж эхэлсэн байна. Ирэх жилийн сонгуульд нэр дэвшихээ мэдэгдээд байсан эрхмүүдээс олны анхаарлыг хамгийн их татсан  нь яах аргагүй экс Ерөнхийлөгч Николас Саркози байсан. 

 

Догшин хэрцгий хуучинсаг үзэлтэй гэдгээрээ танигддаг Саркози өмнө нь тус улсыг таван жилийн хугацаанд тэргүүлж байсан ч, дэмжигчдийнх нь хувь огцом унасны улмаас улиран сонгогдож чадалгүй суудлаасаа унасан.

 

Гэвч террорист халдлага удаа дараа болсонтой холбоотойгоор нэр хүнд нь унаж буй Франсуа Олландыг залгамжлахаар дахин Ерөнхийлөгчид хүч үзэхээр шийдсэнээ өнгөрөгч наймдугаар сард зарлаж, намын даргын суудлаасаа хүртэл буусан юм.  Тэгвэл “Ардын хөдөлгөөний төлөөх холбоо” нам доторх урьдчилсан шатны сунгаанд Н.Саркози бүдэрчээ.  

 

Урьдчилсан шатны сунгаанд долоон эрхэм өрсөлдсөн байх бөгөөд  Н.Саркозигийн дэглэмийн үед Ерөнхий сайдаар ажиллаж байсан Франсуа Филлон тэргүүлсэн бол экс Ерөнхий сайд Алайн Жуппе хоёрдугаарт эрэмбэлэгдсэн байна. Санал тооллогын ажиллагаа бараг дуусч байхад Ф.Филлон 44 хувийн дэмжлэг авсан байсан бол А.Жуппе 28, Н.Саркози 21 хувийн дэмжлэг хүлээжээ. “Өөрийн итгэл үнэмшлээ хамгаалахын төлөө өрсөлдсөн ч, олонхийн дэмжлэгийг авч чадсангүй” хэмээн дэмжигчдийнхээ өмнө мэдэгдэж, ялагдлаа хүлээн зөвшөөрсөн байна. Тус намын шийдвэрлэх шатны сунгаа энэ сарын 27-нд явагдах бөгөөд Франсуа Филлон ялах магадлал өндөр байгааг ажиглагчид онцолж байгаа юм.

 

Ямартай ч, энэхүү сунгаанд ялалт байгуулсан эрхэм ирэх жилийн тавдугаар сард болох Ерөнхийлөгчийн сонгуульд нэр дэвшиж, хэт барууныг баримтлагч улс төрийн хүчин “Үндэсний фронт” намын дарга Марине Ле Пентэй өрсөлдөх бөгөөд тэдний хэн ялсан нь Францын дараагийн төрийн тэргүүн болох билээ. Үндэсний Фронт намын  Ле Пений хувьд 2017 оны Ерөнхийлөгчийн сонгуулийн хамгийн хүчтэй өрсөлдөгчид тооцогдож байгаа.

 

Учир нь Үндэсний Фронт нам нь өнгөрсөн жилийн орон нутгийн сонгуульд илт давуу санал авч байсан, ард иргэдийн дунд нэр хүнд нь хамгийн өндөр байгаа нам юм.