Францын нийслэл Парис хотноо чөлөөт бөхийн ДАШТ болж байгаа билээ. Өчигдөр дөрвөн бөх барилдсанаас 57 кг-ын жинд барилдсан Монгол Улсын Гавьяат тамирчин Э.Бэхбаяр хүрэл медаль хүртлээ. Ингэснээр Э.Бэхбаяр хошой хүрэл медальтай болж байгаа юм. Тэрбээр 2015 онд Лас-Вегасын ДАШТ-ээс хүрэл медаль хүртэж байсан билээ.

Мөн тэрбээр  Монголын чөлөөт бөхийн тамирчдаас ДАШТ-ээс хоёр болон түүнээс дээш медаль хүртсэн 16 дахь, эрэгтэйчүүдээс 10 дахь тамирчин болж байна. Түүний хувьд өөрийн анхны багш, Монгол Улсын гавьяат тамирчин Авирмэдийн Энхээ багшийнхаа адилаар ДАШТ-ий хос медальтан болж байгаа юм.
 

Э.Бэхбаяр Францын нийслэлд эхний тойрогт энэ жилийн Азийн АШТ-д манай ОУХМ З.Занабазарт ялагдсан Киргизстаны Улукбек Жолдошбековыг 12:0-ээр оноогоор цэвэр ялсан.  Харин 1/8 шигшээд залуучуудын ДАШТ болон 23 хүртэлх насны Европын аварга Туркийн Сулейман Атлиг 7:0-ээр тус тус ялсан ч шөвгийн наймд энэ жилийн Азийн аварга Японы Юки Такахашид 4:4-өөр буюу онооны чанараар ялагдав.

Японы бөх шигшээд шалгарснаар түүнд дагах барилдаан гарсан бөгөөд 2016 оны Азийн аварга Энэтхэгийн Сандееп Томарыг 10:0-ээр оноогоор цэвэр ялсан бол  хүрэл медалийн төлөөх барилдаанд ДАШТ-ий мөнгө, хүрэл медальт Болгарын хашир туршлагатай бөх Владимир Дубовыг 9:2-оор ялж дэлхийн хэмжээний бөх гэдгээ нотоллоо.